Emin Əmrullayev deyib ki, ucqar kəndlərdə dərs saylarının az olmasına görə, müəllim çatışmazlığı olur.
"Azərbaycanda ümumilikdə məktəblərdə müəllim çatışmazlığı yoxdur". Sputnik Azərbaycan xəbər verir ki, bunu jurnalistlərə açıqlamasında elm və təhsil naziri Emin Əmrullayev deyib.
Nazirin sözlərinə görə, müəllimlik kifayət qədər rəqabətli sahəyə çevrilib:
"Ucqar kəndlərdə dərs saylarının az olmasına görə, müəllim çatışmazlığı olur. Hazırda məktəb rasionallaşmasını buna görə aparırırıq ki, şagidləri daha yaxşı təhsillə təmin edək. Şagird sayı az olan məktəblərdə, yəni 1, 2, 3 uşaq olan məktəblərdəki şagirdlər digər məktəblərə daşınacaq".
Nazir qeyd edib ki, şagird sayı 100-dən az olan məktəblərin hər birinin rasionallaşdırılacağı yanlış fikirdir.
O, qeyd edib ki, məktəblərdə vətəndaş şikayətləri olur. Hər bir hal araşdırılır.
"Məktəblərdə zorakı hallar olmasına gəlincə, 1 milyon 500 min şagird arasında xoşagəlməz hallar da qaçılmazdır. Hüquq formasında hal olursa, bununla aidiyyəti qurumlar məşğul olurlar", - deyə E.Əmrullayev bildirib.
Emin Əmrullayev bildirib ki, Azərbaycanda 4400-ə qədər məktəb binası var. İstismar müddəti başa çatmış məktəblərlə bağlı iş hər il davam etdirilir:
"Mərhələli şəkildə bu iş bitəcək. Eyni zamanda, azad edilmiş ərazilərdə də yeni məktəblər tikilir".
